कोल्हापूर : स्वामी विवेकानंद शिक्षण संस्थेचे विवेकानंद महाविद्यालय हे शिवाजी विद्यापीठातील एक गुणवत्ताप्राप्त व विविध क्षेत्रांत उल्लेखनीय यश संपादन करणारे महाविद्यालय आहे. नुकताच या महाविद्यालयाला विद्यापीठ अनुदान आयोगाने (यूजीसी) 'कॉलेज विथ पोटेन्शियल फॉर एक्सलन्स' हा दर्जा दिला असून या वर्षी महाविद्यालयाला एक कोटी रुपये अनुदान मंजूर झाले आहे. हा दर्जा या कॉलेजला मिळण्याची ही दुसरी वेळ आहे.
भारत सरकारच्या 'डिपार्टमेंट ऑफ सायन्स अँड टेक्नोलॉजी'ने यापूर्वीच या महाविद्यालयाचा समावेश 'स्टार कॉलेज'मध्ये केला आहे. तसेच या महाविद्यालयास बेंगळुरू येथील ‘नॅक’कडूनही दुसऱ्यांदा ‘ए’ मानांकन प्राप्त झाले आहे.
महाविद्यालयाच्या पुढील वाटचालीबाबत प्राचार्य डॉ. एस. वाय. होनगेकर म्हणाले ‘ अधिक गुणवंत विद्यार्थी घडवण्यासाठी हे महाविद्यालय प्रयत्नशील असून शैक्षणिकदृष्ट्या विविध समाजोपयोगी उपक्रम या महाविद्यालयात राबविले जातील. हे महाविद्यालय स्वायत्ततेकडे वाटचाल करीत आहे. 'यूजीसी'च्या व केंद्र शासनाच्या विविध योजनांतून विद्यार्थ्यांना अधिकाधिक सेवासुविधा देण्याचा आमचा प्रयत्न राहील.’
‘महाविद्यालयाच्या या यशात सर्व शिक्षक व शिक्षकेतर कर्मचाऱ्यांचा मोलाचा वाटा आहे. हे यश संपादन करण्यासाठी संस्थेच्या सचिव प्राचार्य शुभांगी गावडे व संस्थेचे कार्याध्यक्ष प्राचार्य अभयकुमार साळुंखे यांनी वेळोवेळी मोलाचे मार्गदर्शन केले आहे,’ असे प्राचार्य होनगेकर म्हणाले.
या यशाबद्दल कार्याध्यक्ष प्राचार्य अभयकुमार साळुंखे यांनी प्राचार्य, प्राध्यापक व प्रशासकीय सेवकांचे अभिनंदन केले.
